Psa 88 | TpiKJPB | STEP | Wanpela Song o Sam i go long ol pikinini man bilong Kora, i go long namba wan man bilong wokim Musik antap long Mahalat Lienot, Maskil bilong man Esra Heman. ¶ O God BIKPELA bilong kisim bek bilong mi, long san na long nait mi bin singaut long pes bilong Yu.

Psalms 88

Wanpela Song o Sam i go long ol pikinini man bilong Kora, i go long namba wan man bilong wokim Musik antap long Mahalat Lienot, Maskil bilong man Esra Heman.

1 ¶ O God BIKPELA bilong kisim bek bilong mi, long san na long nait mi bin singaut long pes bilong Yu. 2 Larim prea bilong mi i kamap long pes bilong Yu. Yu mas putim ia i go daun long harim singaut bilong mi. 3 Long wanem, tewel bilong mi i pulap long ol hevi. Na laip bilong mi i wok long i kam klostu long matmat. 4 Ol i kaunim mi wantaim ol man i go daun insait long bikpela hul. Mi stap olsem man i no gat strong. 5 Mi stap fri namel long ol daiman, olsem ol man ol i bin kilim i dai na ol i slip long matmat. Yu no save tingim gen ol. Na Yu bin rausim ol long han bilong Yu. 6 Yu bin slipim mi long bikpela hul i daunbilo tru, long ples tudak, long ol ples daunbilo. 7 Belhat tru bilong Yu i stap strong antap long mi. Na Yu bin daunim mi long olgeta si bilong Yu. Sela. 8 Man mi save long em Yu bin putim i go longwe long mi. Yu bin mekim mi i kamap samting i sting tru long ol. Mi stap kalabus, na mi no inap kam ausait. 9 Ai bilong mi i krai sori, long wanem mi karim hevi. BIKPELA, olgeta wan wan de mi bin singaut long Yu. Mi bin stretim ol han bilong mi i go long Yu. 10 ¶ Ating bai Yu soim ol samting i winim tingting long ol daiman? Ating ol daiman bai kirap na litimapim Yu? Sela. 11 Ating pasin bilong Yu long laikim tru man na mekim gut long em bai ol i tokaut long dispela long matmat? O long ples bilong bagarap bai ol i tokaut long pasin bilong Yu long i stap man ol inap bilip long Yu? 12 Ating long ples tudak bai ol i save long ol samting bilong Yu ol i winim tingting? Na long hap graun bilong lusim tingting bai ol i save long stretpela pasin bilong Yu? 13 Tasol O BIKPELA, mi bin singaut long Yu. Na long moningtaim prea bilong mi bai i go pas long Yu. 14 BIKPELA, bilong wanem Yu rausim tewel bilong mi? Bilong wanem Yu haitim pes bilong Yu long mi? 15 I stat long taim mi yangpela na i kam inap nau, mi karim hevi na mi redi long i dai pinis. Taim mi karim hevi long ol samting bilong Yu long pretim man, mi no tingting stret. 16 Belhat tru bilong Yu i paia na em i karamapim mi. Ol samting bilong Yu long pretim man ol i bin bagarapim mi. 17 Olgeta wan wan de ol i bin raunim mi nabaut olsem wara. Ol i bin raunim mi nabaut wantaim. 18 Yu bin putim i stap longwe long mi wanpela i laikim tru mi na i pren bilong mi. Na man mi save long em Yu bin putim long tudak.